Por Belén Vázquez
Nesa orde de
estupideces sempre hai quen afirma que a política municipal é moi próxima aos
cidadáns e que ademais o control e a transparencia veñen dados polo feito de no
eido local todos somos á vez xuíz e parte. Vamos, que iso trasladado a Santiago
de Compostela é case como afirmar que a nosa democracia é participativa, que a
folla parroquial compostelá fai xornalismo humano e responsable e que a
cidadanía xa sabía ben da vida e obra de Roberto Vidal Bolaño antes do 2013,
que para algo vivimos na cidade berce da cultura e nai da meirande parte dos
culturetas que exportamos ao exterior.
Mais a realidade ás
veces é ben distinta, e aquí o único exercicio de política de proximidade
que coñecemos era o que practicaba o anterior alcalde que, cunha libretiña na
man, percorría as rúas de pedra da cidade tomando boa nota de todo aquilo
mellorable e pasaba nota ao chegar as dependencias municipais, e con iso
bastante facía o home, que para ir a camiños e corredoiras xa tiña ao segundo
de abordo. Pero é que os de agora nin xuntos van de viños polo ensanche
compostelán, que se pechan en quendas nun lateral da casa consistorial guiados
polas modas que asumen os máis noviños e transgresores membros das novas
xeracións!
De xuíces e literatura
a cidadanía de Compostela sabemos algo, e as xuízas témolas presentes case que
todos os días nas nosas portadas e oracións das nosas follas parroquiais.
Ademais como parte que somos dunha sociedade informada, concienciada e
participativa, somos dos que ante mal intencionados propósitos e manifestos despropósitos,
manifestámonos e concentrámonos contra todo e contra todos e saímos ás rúas
berrar, sempre que cadre nas horas antes de quedar a tomar uns viños ou ese
domingo non haxa comida familiar nas vilas que nos viron nacer; iso si,
preferiblemente se o conflito, tema ou reivindicación cae fora dos nosos
lindes, por iso de que tamén pertencemos a unha sociedade solidaria e
globalizada.
E así, como cidadáns
próximos á política do noso concello e cun goberno municipal que sentimos
preto de nós e que nos escoita, que atenden aos problemas reais da cidade e dá
resposta ás nosas inquedanzas e necesidades, sóbranos tempo para amosar o
carácter aberto que nos caracteriza sacándolle fotos a canto turista nos para
pola rúa e para dar indicacións de como chegar a unha mal sinalada Praza do
Obradoiro, na que se conxuga toda a esencia do ser e existir da nosa sociedade
compostelá.
Tampouco hai que facer
máis, ben sabido que Compostela é una cidade que se goberna soa e que vivimos
da Universidade, da Xunta e dos que veñen de fóra guiadiños por una estrela que
os leva ata o campus da vida.
Nesa composición
esperpéntica da nosa realidade política, e cuns voceiros na oposición de perfil
baixo, e “rechoncho”, ao máis que podemos aspirar no inicio deste curso
político é a consolidar a un goberno moi preocupado e ocupado no mantemento das
pedras e das fontes e no aforro enerxético dos farois da cidade, e mesmo das
súas propias “ farolas”, e agardar que cos deberes dos libros de vacacións
cubertos, algunhas saiban xa situar a Berenguela e outros o depósito de coches,
e a corporación no seu conxunto, atendese e entendese as directrices explicadas
nas escolas de verán.
Como contrapunto ao
punto, nos mentideiros fálase do desembarco do líder da aldea gala como
alternativa e con opcións de goberno na capital, da necesidade de que haxa
candidaturas populistas, ou populares como se lles queira chamar, como si das
eleccións ao reitorado se tratase, e mesmo de que ex-persoeiros da política
galega collan o temón na capital antes de os envites da quinta provincia fagan
encallar o barco, ou mesmo terminen por afundilo.
Logo, e como se iso non
fose abondo, están os aferrados ao pasado dos dous principais bandos: os que
botan en falta os tempos do caudillo e que van de viños pola rúa que pensan que
lle debe o nome a tan “alto” referente popular e os que seguen amentando ao
Tierno Galván compostelán como exemplo de xestión dun urbanismo político que
quizais, e só quizais, precise acometer algunha que outra reforma.
E ademais como en
Compostela amanece que no es
poco, e diso hai que dar
grazas a deus e ao apóstolo cada día, asumimos a crenza de que todos somos continxentes
pero o alcalde, sexa cal sexa e caian cantos caian, é necesario e punto, e a
seguir contratando e pagando “pelotas”.
Mentres, como os tempos
de informar e reformar aínda non son chegados e tampouco se lles espera, se nos
deixan seguiremos a deformar a realidade… que si de algo podemos presumir é da
sabedoría do Valle-Inclán, no que aínda que agora non proxectan películas,
tamén sabemos onde adoita sentar na Alameda.
No hay comentarios:
Publicar un comentario